LewLewal Communication

Sukaaɓe rewɓe jeyaaɓe e komin mo ɓokki Jawe, kuccondiriino e jaayndiyaŋkooɓe ñande Aljuma 12 me 2017, sabaabu o ko wiyde hono meer maɓɓe Kaaliidu Wage ko jamfiiɗo ɓe e kaalisaaji garnooɗi toon tawi ko e yamiroore mawɗo leydi ndii o rewni ɗum e Mustafaa Joop jaagorɗo kalfinaaɗo ngalu paangu e eɓɓooje rewɓe. Ngalu nguu tolniima e 600 Miliyoŋ seefaa, tawi fayi ko e diiwaan Maatam e pelle rewɓe diiwaan e eɓɓooje keñoraaɗe ngam ɓamtaare PSE, tawi koko faati e ndema, awo, ngaynaaka. Komin mo ɓokki Jawe feccii heen Miliyoŋaaji 20. ɗum ɗoon ko rewɓe ɓee fof ko aldaa heedi heeda poti feccude ɗum, kono yahraani noon sabu meer komin o ƴetti tan ko rewɓe 5 o totti ɓe heddiiɓe ɓee njooɗii. ɗum ɗoon ɓe mbii ɓe njahdaani heen, e wiyde Kadijaa Sih, joginooɗo konngol maɓɓe, yiɗde maɓɓe ko Miliyoŋaaji 20 ɗi yoo ngartu ko ɓuri yaawde e yaaccaade, ko aldaa e lajal, so ɗum alaa na waawi jibinde mettere ɓerɗe haa so yontii suɓngooji paaɗi yimɓe ɓee ngootoya baŋnge goɗɗo ɗum ɗoon wonaa ɓural e lannda APR kono kadi wonataa ɓural e mawɗo leydi ndi Makki SAL, e wiyde KADIJAA SIH joginooɗo konngol maɓɓe ñande heen