LewLewal Communication

Nanngal naange ina fadaa e 27 Morso 2018. Ko nanngal juutngal hakke waktu e hojomaaji 43 etee e oon tuma ko naange ngee fof mutat. Nanngal naange ngee ko waktuuji 17 kikiiɗe pawɗi hojomaaji 15. Mutal naange hirnaange Afrik hawrata ko e nge mutii. Hay lewru maa nannge e ngaal lajal. Lewru nduu maa wojju coy e dow battane nanngal naange ngal. Ko ngal ɗoo nanngal naange wonata ɓurngal mawnude e duuɓi teemedere garooji.
Lewru maa wirno e mbeelu jahdiiɗo mayru Ngaawe (Leydi) ñalnde 27 Morso, ko ngool hebori waɗtude laawol ɗiɗmol ko lewru ina nanngee e nder ndee hitaande 2018, kadi ko ngol hebori won’de nanngal ɓurngal juutde e nder duuɓi teemedere paaɗi ( hakkunde 2000 e 2100), sabu maa ndu nannge haa laaɓa fotde 01 :43, hade ndu woppitireede seese, ɗuum ina ɓadondiri e kaaɗtudi nanngal mayru, sabu ko nanngal juuti fo ɓurataa 01 :47.
Naatgol lewru e mbeelu leydi haa yalta ko e 06 :14 timmata, nanngal lewru ngal fuɗɗotoo e ko 17 :15 GMT, ɗuum ko hade mutal naange e yoga e leyɗeele hirnaange Afrik, ko ndeen ndu fuɗɗotoo naatde e mbeelu Ngaawe, so yahii haa wonii 19 :30 ndu nanngee haa ndu timma, ndu wojja coy sabu mayru lommbaade e mbeelu Leydi he, ɗuum noo firti ko mutal naange to hirnaange Afrik hawrata ko e ndu nanngaa haa ƴoƴi, so naange muti ñalnde 27 Morso tan yo en mbaɗtu hakkillaaji men e fuɗnaage, lewru ummotoo ko ina nanngaa haa wojji coy.
Ko noon woorata haa 21 :13 nde ndu fuɗɗoo fooynude seeɗa, ndu yaaɓana seertude e mbeelu leydi, boɗoyol ngol ustoo, haa ndu ɗaccitoyee haa laaɓa hedde 23 :28.
Boɗoyol lewru ndu ko batte kedde ciiñsiiñƴe naange naatɗe e faandu henndu Leydi, ɗeen ciiñsiiñƴe keltee haa leefa, sabu ina gasa ɗe kawra e duule e punndi Leydi, so ɗe njotiima Lewru, ɗe njottotoondu ko eɗe leefi e ɗe ngojji, ko ɗuum wojjinta ndu.
Kadi tuma nde ndu nanngete nde tawata e ndu lusoyi no feewi sbau yolnde hakkunde men e mayru maa wooy 404 300 km, ɗuum noon ndu feeñata ñalnde nanngal nde ko e ndu famɗi.
HAMMADI JAH